"MESTRE HAKOTU LIA BA-NIA ESKOLANTE" de Abe Barreto

MESTRE HAKOTU LIA BA-NIA ESKOLANTE
(A MASTER TO HIS DISCIPLE)

“Hetok ha’u hatene, hetok ha’u sinti ha’u seidauk hatene buat barak.”
KATUAS HO FERIK SIRA HATETE


Ha’u hakat, hiit an mai iha fatin ida ne’e
Hosi fatin ida ne’e duni maka ha’u sei hala’o ha’u-nia viajen naruk
Iha ne’e
Ha’u hamrik, hateke rai fehan
Iha ne’e
Ha’u hamrik, hateke foho oan
Iha ne’e
Ha’u hamrik, hateke foho lolon

Ha’u sei la’o, hakat liuhosi rai fehan
No ha’u sei la’o, hakat sa’e ba foho tutun


Ha’u sei la’o, husik hela ain leut lubuk

Molok ha’u atu la’o, no husik hela ó
Ha’u la husu buat barak,
Husu deit buat laek ida:
“Bainhira oras to’o ona ba ó atu hala’o ó-nia viajen rasik, no hakat
Hodi la’o tuir ha’u,
Keta buka koko atu sama tuir ha’u-nia ain leut,
Maibé
Ó tenke buka atu hamosu ó-nia ain leut rasik!”
---
Dili, 2007

Abe Barreto Soares